Cebu, Philippines — Giawhag sa buhatan sa Traffic Enforcement Agency of Mandaue (TEAM) ang mga motorcycle taxi sa Angkas ug Joyride nga mokuha og clearance sa ilang buhatan alang sa pagtugot kanila sa ilang pagpamasahero.
Subay niini dunay mokabat sa 26 ka motorcycle taxi ang nakabalik na sa pagpamasahero human nila makuha ang clearance gikan sa buhatan sa TEAM.
Si Edwin Jumao-as, executive director sa buhatan sa TEAM miingon nga ang Angkas ug mga Joyride drivers nakakuha og clearance niadto pang miaging semana.
Mokabat sa P100,000 ang kantidad nga nakolekta sa TEAM gikan sa 60 ka motorcycle taxi drivers nga mikuha og TEAM clearance.
Dugang ni Jumao-as nga ang maong collection naggikan sa mga drivers nga adunay napundo nga kalapasan sa lagda sa trapiko.
Pipila kanila ang nagbayad og P2,000 ngadto sa P5,000.00 ug ang labing dako nga bayranan mao ang P15,000.00.
Suma ni Jumao-as nga ang kadaghanan sa kalapasaan nga nahimo sa mga driver mao ang disregarding traffic signs, samtang ang TEAM clearance nga ilang kuhaon nagkantidad lamang og P100.00. (BANAT NEWS)