CEBU, Philippines — Aron masiguro nga hapsay ug organisado ang Barangayanihan Ayuda sa Cebu City Police Office nga simultaneous nga gihimo sa 11 ka police station sa siyudad ang City Mobile Force Company(CMFC) nakig-alayon kini sa barangay.
Gipahigayon kagahapon sa CCPO ang ilang Barangayanihan Ayuda alang sa katawhan nga nahimutang diha sa gawas nga bahin sa Camp Sotero Cabahug sa Gorordo Avenue.
Matud ni Police Colonel Josefino Ligan, direktor sa CCPO nga gipahigayon nila ang maong programa aron makatabang sa mga tawo nga nanginahanglan gyud og tabang.
Nakig-alayon sila sa mga barangay aron maoy modeterminar sa angayan nga hatagan og Barangayanihan Ayuda. Pinaagi niini ang mga madeterminar sa barangay hatagan og coupon diin gibutang diha sa coupon ang oras nga pwede sila moadto sa Barangayanihan.
Gipasabot ni Ligan nga bahinon nila ang oras sa mga tawo aron dili kini magdasok.
Giklaro ni Ligan nga kadtong naay coupon lang ang hatagan ug dili pwede ang walk-in.
Gibutyag ni Ligan nga direktiba sa ilang labaw nga kon magpahigayon og community pantry kinahanglan organisado ug aron mahimo kini angayan nga adunay koordinasyon sa gustong malambigit niini ilabi na sa Barangay kun asa nahimutang ang Barangayanihan Ayuda.
Nanghinaot si si Ligan nga ma-sustain nila ang maong Barangayanihan Ayuda diin plano nila nga kada Biyernes aduna sila’y himuong merkado o Barangayanihan.
Ang Barangayanihan sa CCPO gawas sa delata, noodles, itlog ug bugas aduna usab kini mga utanon nga gipanghatag.