3 mil senior citizens nabakunahan na

CEBU, Philippines — Kapin na sa 3 mil ka mga senior citizens sa siyudad sa Sugbo ang nakadawat sa ilang unang dose sa coronavirus disease (COVID)-2019 vaccine  sumala pa ni Dr. Jeffrey Ibones, pangulo sa Cebu City Health Department. Sa unang adlawa nga vaccination rollout sa senior citizens niabot sa 793 ang nabakunahan, sa ikaduhang adlaw niabot og 1,100 ug sa ikatulong adlaw naa sa 1,144.

Base sa ilang data, 19 mil ka senior citizens sa dakbayan ang nagparehistro nga magpabakuna . Kapin 10 mil ang nipadayag nga gusto gyud magpabakuna.

Ang Cebu City Health Department dunay 5,000 doses sa Sinovac vaccines ug 3,000 na niini ang ilang nagamit.

Online registration

Ang Cebu City dunay dul-an 90,000 ka mga senior citizens base sa listahan sa Office of the Senior Citizens Affairs (OSCA) Cebu City.

“Ato lang gyud gi-encourage atong senior citizens nga kinahanglan lang gyud nila magpa online registration aron ini’g abot diri dali nalang dili na sila mag-fill up pa,” matud ni Ibones.

Ang online registration maoy basihan sa DOH sa gidaghanon sa bakuna nga ilang ihatag.

Vaccination sites

Samtang gipahibawo ni Cebu City Councilor Dave Tumulak nga laing vaccination site ang buksan diha sa SM City Cebu nga nahimutang sa North Reclamation Area. Ang Vice President sa SM Prime Holdings Incorporated Marissa Fernan miingon nga panahon sa kalisod ang SM andam moserbisyo sa katawhan.

Tinguha sa siyudad nga madugangan pa ang vaccination sites aron mas paspas ug daghan ang mabakunahan kada adlaw.

Base sa datos nga gipagawas sa Department of Health Central Visayas niadtong Miyerkules, Abril 22, naa nalang sa 868 ang active cases sa COVID-19 sa Cebu City. Ang siyudad nakatala og 69 ka bag-ong kaso sa virus anang adlawa, apan  73 ang dugang nangaayo.

Ang Mandaue City nakatala og siyam ka bag-ong kaso ug 505 ang ilang active cases samtang 17 ang napuno sa mga nangaayo ug dunay duha nga nadugang sa mga namatay. Ang Lapu-Lapu City nakatala og 19 ka bag-ong kaso ug naa sa 759 ang active cases niini. Sa samang adlaw, 22 ang nadugang sa mga nangaayo ug usa ang dugang nakalas.

Di magpabakuna

Sa pikas bahin, 65 porsiyento lamang sa mga A1 priority nga mga kawani sa kagamhanan sa dakbayan sa Lapu-Lapu nakadawat og bakuna sa nagpadayon nila nga vaccination program matud pa ni Dr. Agnes Realiza, pangulo sa  Lapu-Lapu City Health Department. Target sa LCHD mabakunahan ang 2,969 ka mga health medical workers gikan sa mga COVID - 19 referral hospitals, public ug private  hospitals ug mga giila nga mga COVID  -19 care, isolation and quarantine facilities.

Si Nagiel Bañacia,. pangulo sa Disaster Risk Reduction and Management Office (DRRMO) sa Dakbayan sa Lapu-Lapu miingon nga kasagaran nagdumili sa pagpabakuna mga sakop sa Barangay Health Emergency Response Team (BHERTs). —Romeo T. Limpangog/IBM (BANATNEWS)