Multa sa walay face mask sa probinsiya tangtangon na

CEBU, Philippines — Nipagawas na og memorandum si Gobenador Gwendolyn Garcia sa Probinsiya sa Sugbo alang sa mga mayor sa nagkadaiyang lungsod ug dakbayan sa probinsiya alang sa pagpatangtang sa multa sa mga wala magsul-ob og face mask.

"In light of the economic hardships experienced by Cebuanos due to COVID-19 pandemic, please refrain from imposing any form of monetary penalties upon persons found not wearing face mask and/or face shield within your municipality or city", tipik sa memorandum nga gipetsahan og Abril 20, 2021.

Matud ni Garcia nga adunay alternatibo nga regulasyon alang sa pagpasul-ob og face mask pinaagi sa pagbadlong, pagpahimangno ug pag-lecture sa mga tawo nga kinahanglang kanunay mag sul-ob og face mask.

Sayo pa, si Garcia nihulagway nga "anti-poor" ang pagpamulta sa mga wala magsul-ob og face mask. Samtang si Cebu City Mayor Edgardo Labella ipadayon niini ang pagpahamtang og multa o pagpaubos sa community service sa mga tawo nga madakpan tungod kay wala magsul-ob og facemask.

Matud ni Labella nga kinahanglang ipatuman ang mga sanctions sa dili magsul-ob og facemask aron ang katawhan magpanagana sa paglapas sa minimum health protocols.

Si Labella nagkanayon nga gitahod niya ang desisyon sa silingan nga Local Government Units (LGUs) mahitungod sa pagsul-ob og face mask sama sa Probinsiya sa Sugbo kinsa niwagtang sa penalties sa mga dili magsul-ob og facemask.

Nagkanayon nga ang siyudad adunay ordinansa kabahin sa pagpahamtang og penalties sa mga molapas sa health protocols. —Decemay P. Padilla/BDB (BANATNEWS)