CEBU, Philippines — Ang konseho sa Dakbayan sa Sugbo nihangyo sa Office of the Building Official (OBO) sa pag-survey sa sidewalks sa dalan Colon ug sa connecting streets aron pagsuta kon ang maong mga sidewalk nituman ba sa Batas Pambansa Bilang 344 kun “An Act to Enhance the Mobility of Disabled Persons by Requiring Certain Buildings, Institutions, Establishments, and Public Utilities to Install Facilities and Other Devices.”
Ang konseho sa Dakbayan sa Sugbo niaproba sa resolusyon nga gipangamahan ni Konsehal Raul Alcoseba kabahin sa maong katuyoan.
Matud ni Alcoseba nga naobserbahan nga adunay mga sidewalks sa dalan Colon, Legaspi ug V. Gullas ang giingong dili PWD friendly ilabi na nga ang maong sidewalks adunay elevation ug pipila ka mga establisamento ang nagtukod og flood control concrete structure nga nakababag na hinuon sa moagi.
Tinguha sa Batas Pambansa Bilang 344 nga makab-ot ang barrier free environment nga maghatag sa mga disabled person og access sa public ug private building ingon man sa mga establisamento.
Sa usa ka corollary motion, si Konsehal Alvin Dizon nihangyo sa executive department sa pagpatuman sa “Barrier-Free Tourism Ordinance” nga gipasar sa konseho diin ang author niini sila si Dizon ug Konsehal James Anthony Cuenco.
Tumong sa maong ordinansa sa pag-institutionalize sa universal barrier-free designs, standards ug specifications alang sa tourism-oriented establishments sama sa hotels, resorts, restaurants, malls ug uban pa aron pagtubag sa panginahanglanon sa PWDs, elderly ug ubang sektor nga nagkinahanglan og special needs.
Samtang si Bise Mayor Michael Rama nipadayag nga gikinahanglang himuon ang legislative hall sa city hall nga PWD friendly. —BDB (BANATNEWS)