Mga Jubilee Door, 500 YOC gibuksan kagahapon

CEBU, Philippines — Usa ka Santos nga Misa nga gipangulohan ni Cebu Archbishop Jose Palma ang gipahigayon sa wala pa ablihi ang mga Jubilee Door kagahapon sa hapon.

Human sa pagbukas sa Jubilee Door gisunod ang pagbasa sa deklarasyon sa pagbukas na sa usa ka tuig nga kalihokan sa “500 years of Christianity”.

Kagahapon sa alas 4:00 sa hapon gipahigayon ang Santos nga Misa diha sa tanang simbahan sa Archdiocese of Cebu kinsa si Palma ang nangulo diha sa Cebu Metropolitan Cathedral.

Gawas sa pagbukas sa 13 ka Jubilee Door nga gihinganlan ni Pope Francis gi-unveil usab ang mga Jubilee Cross.

Gibasa usab ang mga kalihokan sa 500 YOC sulod sa usa ka tuig nga apilan sa tanang mandated organization ug magtutuo.

Sa Archdiocesan Shrine of San Nicolas de Tolentino nga usa sa mga simbahan nga gihinganlan isip usa sa mga buksan nga Jubilee Door apan wala pa kini mabuksi tungod kay iatol ang pagbukas niini sa pagsaulog sa ilang “Kaplag”.

Matud ni Monsignor Roger Fuentes team moderator sa Archdiocesan Shrine of San Nicolas nga buksan nila sa sunod buwan ang ilang Jubilee Door diin sa pagkakaron padayon pa kini nga gitrabaho.

Matud usab ni Fuentes nga sa sunod buwan saulogon usab sa Archdiocesan Shrine of San Nicolas de Tolentino ang ika-437th parish celebration o anniversary sa Kaplag.

Ang mga nibukas sa Jubilee Door gilangkuban sa St. Peter and Paul Parish sa Bantayan Island; Cebu Metropolitan Cathedral; St. Catherine of Alexandria Parish sa  Carcar City; Patrocinio de Maria Parish sa Lungsod sa Boljoon; St. Anne Parish sa Lungsod sa Barili; St. Joseph Parish sa Mandaue City; San Guillermo De Aquitana Parish sa Lungsod sa Dalaguete; St. Michael the Archangel Parish sa Lungsod sa Argao; National Shrine of Nuestra Señora Virgen dela Regla sa Lapulapu City; Sto. Tomas de Villanueva Parish sa Danao City; San Vicente Ferrer Parish sa Bogo City ug San Francisco de Asisi Parish sa Lungsod sa Balamban. BDB (BANATNEWS)