CEBU, Philippines — Kapin sa tunga sa milyon ka pesos nga balor sa illegal nga drugas ang nasakmit sa gipahigayon nga buy bust operation sa mga sakop sa Philippine Drug Enforcement Agency 7 sa may L. Gabuya Street, Barangay Inayawan, Dakbayan sa Sugbo, Lunes sa gabii.
Ang nasikop naila nga si Ernesto Cahigas Jr, 43anyos, usa ka electrician nga taga Cogon Pardo.
Nasakmit sa mga otoridad ang mga pinutos sa ginadili nga drugas nga mobalor ug P680mil buy-bust money, usa ka mobile phone ug laing non-drug evidence.
Matud pa ni Leia Albiar-Alcantara, tigpamaba sa PDEA-7, nga ang dinakpan giingong maka baligya ug usa ka kilo nga shabu matag semana.
Samtang usa usab ka barangay konsehal sa Ginablan, Lungsod sa Badian ang nasikop buy-bust operation Lunes sa hapon.
Ang nasikop naila nga si Konsehal Eugene Comision, 30anyos, minyo ug nagpuyo sa maong lugar.
Nasakmit gikan kaniya ang unom ka pakete sa gituohang shabu, ug buy bust money.
Laing duha ka pusher og shabu ang nadakpan sa managlahing buy bust operation sa kapolisan sa Compostela Police Station ug Liloan Police Station
Ang nadakpan giila nga si Alain Pepito Avila, 37 anyos, nakuha sa iyang posisyon ang pakete sa shabu, P500 nga buy bust money, disposable lighter ug usa ka linukot nga tinfoil
Samtang sa liloan nasikop usab si James Libut-libot, 24 anyos kinsa nakuhaan og upat ka ka pakete nga shabu.
Lima usab ka adis-adis nga nag pot session ang nadakpan sa mga rattan defenders atol sa ilang pagpatrolya sa sitio Rattan, Barangay Tanke, Dakbayan sa Talisay kagabii.
Ang mga dinakpan mao sila si Reyboy Cuestas, 27 anyos; Edward Canizares, 28 anyos Clariben Quezon Dionesio, 30 anyos; Erickson Canizares Dionesio, 39 anyos ug Elmer Sellote Aupe, 40 anyos. Romeo T. Limpangog/Gabriel Bonjoc/MEL (BANATNEWS)