Cebu, Philippines — Natanggong karon sa prisohan ang usa ka sakop sa Philippine Air Force human kini gireklamong nanion og armas diha sa Sitio Relis, Barangay Poblacion 1, Dakbayan sa Carcar alauna sa kaadlawon kagahapong adlawa.
Ang nasikop mao si PFC Jeric Bucog Alesna, 25, taga Sitio Camomot Barangay Poblacion 1, Carcar City nga nakadestino sa Lanao del Norte. Samtang ang mga mireklamo mao ang managkabanay nga Roel Barberos, 23, Reymart Barberos,18, Ryan Barberos, 25, pulos residente sa maong lugar.
Ang arresting officers mao sila si Police Master Sergeant Jessie Lloyd Sebial ug Police Staff Sergeant Miguelito Abadilla kinsa miresponde human dunay nanawag sa ilang buhatan bahin sa sundalong nagmaoy.
Apan nakalakaw na ang suspek pagabot sa mga polis hinungdan nga gilusad ang hot pursuit operation nga niresulta sa pagkasikop kaniya.
Nasakmit sa kapulisan gikan sa dinakpan ang usa ka 1911 A2 FS Tact Cal. 45 Pistol nga dunay serial number ug mga bala.
Wala pa matino kung unsay sinugdanan o hinungdan nganong gitionan sa maong sundalo ang mga reklamante. (BANAT NEWS)