Cebu, Philippines — Gihangyo ni Mayor Edgardo Labella ang PUJ drivers nga motuman gyud sa health protocols ug traffic rules. Mao kini ang gihatag niya nga kondisyon alang sa pagbalik og biyahe sa mga tradisyonal nga Public Utility Jeep nga gikan sa Mandaue City ug Talisay City.
Tumong ni Labella nga makabalik na og biyahe sa Dakbayan sa Sugbo karong Lunes ang mga PUJ nga gikan sa nahisgotang mga siyudad kini kon walay kausaban sa giisyu niya nga executive order.
Si Labella nimando na kini sa Cebu City Transportation Office (CCTO) nga mag-alerto sa pagbalik og biyahe sa mga PUJ gikan sa Mandaue City ug Talisay City. Matud ni Labella nga ang mga drayber nga dili motuman sa health protocols ug sa balaod sa trapiko ang manubag sa nahimo nilang kalapasan. Ang maong desisyon ni Labella base kini sa rekomendasyon sa Cebu City Jeepney Task Force nga gipangulohan ni Konsehal James Anthony Cuenco.
Nasayran nga taud-taod na nga nihangyo ang TPUJ drivers sa silingang dapit sa siyudad gumikan sa kalisod na sa ilang kahimtang. Pipila ka buwan na nga nawad-an og panginabuhian ang mga drayber tungod sa pandemiya. (BANAT NEWS)