CEBU, Philippines — Gikatakda karong adlawa nga magpaturok og vaccine batok sa COVID-19 si Konsehal Joel Garganera, head sa Emergency Operations Center (EOC) sa Siyudad sa Sugbo.
Gibutyag ni Garganera nga pipila niya ka kauban sa EOC ang magpaturok usab.
Matud ni Garganera nga bisan unsa nga brand sa bakuna nga available magpaturok siya niini.
Nasayran nga ang vaccine nga Sinovac nga gikan sa China maoy unang naabot dinhi sa nasud.
Samtang si Konsehal Dave Tumulak nagkanayon nga kon mahatagan siya og opurtunidad nga malakip sa unang hugna nga maturokan og Sinovac wala ra siya’y problema niini aron mawala ang kahadlok sa katawhan ingon man usab mapaambit niya kon aduna man gani side effect.
Nunot niini, si Cebu City Administrator Floro Casas Jr. nagkanayon nga adunay tulo ka mga mall ang nitanyag nga magpagamit sa ilang pasilidad isip vaccination centers.
Nalakip usab sa mahimong vaccination sites mao ang pipila ka hamugaway nga lugar sa simbahan, eskwelahan, gym ug uban pa.
Samtang si Bise Mayor Michael Rama nidasig kini sa katawhan nga magpabakuna sa higayon nga maabot na ang igong stocks sa mga bakuna.
Sa laing bahin, si Dr. Jeffrey Ibones, Cebu City Health Officer ug co-chairman sa Vaccine Advisory Board nibutyag nga gipangayoan na sila sa Department of Health (DOH)-7 og lista sa mga medical health workers sa Cebu City nga gikan sa public ug private hospital nga qualified aron mahatagan og bakuna.
Gibana-banang nga moabot ngadto sa 7,000 ka frontliners ang nalista sa Cebu City Health Department.
Matud ni Ibones nga nahuman na sila og himo sa lista sa frontliners nga maoy priority sa bakuna.
Nunot niini, gisugdan na sa kagamhanan sa Dakbayan sa Mandaue ang profiling sa mga sektor nga maoy unahon sa pagbakuna.
Si Subangdaku Barangay Captain Ernie Manatad, vaccine czar ug Association of Barangay Council (ABC) president sa Dakbayan sa Mandaue nagkanayon nga ang Mandaue Information System (MISO) ug ang Data Management Team nakapahigayon na og orientation ngadto sa mga personnel sa kabarangayan sa siyudad.
Sa maong orientation gitudlo ngadto kanila ang mga paagi sa online registration, encode information sa matag individual nga bakunahan ug ingon man ang pag-assist sa target vaccinees alang sa pag-fill up sa registration forms.
Si Retired Major General Mel Feliciano, deputy chief implementer sa IATF for the Visayas niawhag sa publiko nga paaboton ang bakuna ug dili magdali-dali nga makabaton niini.
Gibutyag ni Feliciano ang report nga giingong adunay mga vaccine nga gibaligya sa black market ug padayon kining gi-monitor sa gobiyerno. —Decemay P. Padilla, Romeo T. Limpangog, Rowena D. Capistrano/BDB (BANATNEWS)