CEBU, Philippines — Gibutyag sa chairman sa committee on peace and order sa konseho sa Siyudad sa Sugbo nga si Phillip Zafra nga iyang irekomendar ngadto sa Emergency Operations Center nga wad-on na ang pisikal nga kalihukan sa semana santa karong tuiga.
Suma pa ni Zafra nga sama sa miaging tuig ipaagi na lang og virtual ang mga kalihukan lakip na ang visita iglesia, via cruces ug uban pa.
“Mas maayo nga mag-online lang sa ta karon kay grabe naman gud ang pagsaka sa COVID19. Hinoun amo pa kini i-recommend sa EOC, kun unsa ang ilang desisyon, among respitohon,” suma pa ni Zafra.
Gidugang ni Zafra nga dili gyud malikayan ang pagdagsa sa mga tawo ilabi na kun dunay prosesyon ug peligro kaayo nga dili mamintinar ang physical distancing.
Gitataw hinuon sa konsehal nga duna pud siyay himoon nga konsultasyon sa kadagkoan sa simbahan alang sa iyang rekomendasyon.
Kahinumdoman sa miaging tuig, nakanselar usab ang physical activities gumikan kay niadtong higayona mao ang pagtumaw sa pandemya.
Kasagaran sa mga simbahan nipahigayon na og misa pinaagi sa online nga makita sa ilang social media account.
Ang bendita sa lukay mahitabo karong Marso 28, Abril 1 ug 2, ang Huwebes Santo ug Biyernes Santo, samtang ang pagsaulog sa “sugat”, karong Abril 4. —MEL (BANATNEWS)