CEBU, Philippines — Si Cebu Archbishop Jose Palma mapasalamaton human silang duha ni Bishop Antonio Rañola naayo na gikan sa COVID-19.
Matud ni Palma nga mahinungdanon kaayo kanilang duha ni Rañola ang adlaw nga Domingo tungod kay naka-recover na sila sa sakit nga COVID-19 ug makabalik na sila sa ilang trabaho ug ministro.
Nasayran nga sulod sa napulo ka adlaw nga na-admit sa tambalanan si Palma ug Rañola human kini matapti sa virus.
Gitug-an ni Palma nga liboan ang nangasakit ug adunay mga nangamatay tungod sa COVID-19 apan usa usab kini ka oportunidad sa pagpasalamat ilabi na sa ilang kaluwasan.
Si Palma nagpasalamat sa tanang hospital staff, doctors ug mga caregiver nga niatiman kanila.
Gipaabot usab ni Palma ang iyang pasalamat sa tanang nag-ampo sa ilang kaayohan ug nasinati gayud nila ang gugma.
Subay niini, si Palma nipadayag nga padayon ang mga kalihokan sa “500 years of Christianity”. BDB (BANATNEWS)