Propaganda streamers gipatangtang sa OBO
CEBU, Philippines — Nag-trending karon sa social media ang mga hulagway diin makita ang mga streamer nga adunay suwat nga “Run Sara Run” ug gitaod kini diha sa pipila ka bahin sa kadalanan ilabi na sa mga skywalk sa Dakbayan sa Sugbo.
Gitataw sa pangulo sa Office of the Building Official (OBO) Architect Florante Catalan nga wala sila’y nadawat nga aplikasyon sa pag-secure og permit sa maong mga streamer.
Hinungdan nga gitugyan niya ngadto sa Prevention, Restoration, Order, Beautification and Enhancement (PROBE) team ang iyang rekomendasyon alang sa pagpatangtang sa maong mga streamer.
Nasayran nga gawas sa Siyudad sa Sugbo nabantayan usab ang maong klase sa propaganda diha sa nagkadaiyang dapit sa nasud ug gitaod kini kasagaran sa mga skywalk. Usa sa basic protocol ang pagkuha og permit kong adunay itapot diha sa mga property sa gobiyerno sama sa taytayan, center island ug uban pa.
Mabantayan nga ang nakasuwat diha sa streamer nag-aghat kang presidential daughter ug Davao City Mayor Sara Duterte nga modagan pagka-presidente sa umaabot nga piniliay karong 2022.
Gani ngadto sa kaulohan aduna nay panagtigom sa supporters niini ug nagsige og panawagan kang Sara nga modagan pagkapangulo aron mapadayon niini ang mga proyekto nga nasugdan sa iyang amahan nga si Presidente Rodrigo Duterte .
Sa nangaging pamahayag sa presidente niklaro kini nga walay plano ang iyang anak nga magpapili pagka-presidente sa nasud.
Sa ulahing resulta sa Pulse Asia survey nalakip ang pangalan ni Sara sa giingong pilianan sa mga tawo alang sa pagkakandidato isip presidente. BDB (BANATNEWS)
- Latest
