CEBU, Philippines — Dili momenus 2, 000 ka mga panimalay sa lungsod sa Poro isla sa Camotes ang makabenipisyo sa Level III waterwork system nga itukod didto sa maong lungsod.
Si Gobernador Gwendolyn Garcia maoy nangulo sa groundbreaking sa maong proyekto nga mokantidad og P24.8 million.
Tungod kay ang Kapitolyo naman ang nigasto niini dili na kinahanglan pa nga mo apply og loan o mangutang ang lungsod sa Poro alang pagpondo sa maong proyekto. Apil sa mga makabenipisyo sa waterwork projects mao ang mga residente sa Barangay Teguis, Mercedes ug Esperanza kon diin ang tinubdan niini gikan sa Mokbok Spring sa Teguis.
Si Poro Mayor Edgar Rama nagpasalamat nga masulbad na ang problema sa patubig sa ilang lugar nga matod niya dugay dugay na nga suliran sa mga taga Poro.
“Mapasalamaton ming dako, labi na sa atong pinalanggang governor na iya gyud ming gitagaan og proyekto ilabi na kaning patubig. Suma pa ni Rama.
Ang kapitolyo mao usab ang mohulip sa karaan nga mga tubo ug modugang sa reservoirs alang sa pag-agas sa tubig ngadto sa mga barangay padulong sa mga panimalay.
“Di ko musugot anang communal, unya mag-sag-ob napud. Kinahanglan naa gyuy gripo sa matag balay, naa gyuy shower nga di na magkabo-kabo, diretso nang tubig gikan sa taas,” matud ni Garcia. —MEL (BANATNEWS)