CEBU, Philippines — Modawat na ang Probinsiya sa Sugbo og mga turista nga gikan sa laing mga probinsiya sa nasud.
Alang sa mga bisita nga mopuyo lang diha sa resorts ug hotel kinahanglan nga magpakita sila sa pre-booked reservation sa ilang kapoy-an samtang kadtong gusto masinati ang mga tourist activities sa probinsiya sama sa canyoneering sa Lungsod sa Badian kinahanglang magpa-book daan sa online sa website sa Probinsiya sa Sugbo (https://discover.cebu.gov.ph/).
Base sa report sa Sugbo News nga ang pagbukas og balik sa turismo sa Probinsya sa Sugbo gawas sa lalawigan maoy nauyonan sa Cebu Provincial Tourism Task Force sa tigom nga gipatawag ni Gobernador Gwendolyn Garcia niadtong Pebrero 11, 2021.
Pamaagi kini aron mabuhi og balik ang tourism industry sa lalawigan.
Nagbase kini sa bag-ong Omnibus Guidelines on the Implementation of the Community Quarantine sa Pilipinas nga giluwat sa Inter-Agency Task Force on the Management of Emerging Infectious Diseases (IATF-MEID) nga nagkanayon nga ang mga lugar ubos sa Modified General Community Quarantine (MGCQ) ug General Community Quarantine (GCQ) mamahimo na nga makalabang sa borders pinaagi sa pagtuman sa minimum requirements.
Ang task force magtigom sa sunod semana alang sa pag-finalize sa guidelines diin imbitado ang tour operators, shipping ug airline companies. —BDB (BANATNEWS)