CEBU, Philippines — Miapilar si Mayor Junard Ahong Chan sa Mactan Cebu International Airport Authority (MCIAA) nga ibalik diha sa airport ang help desk sa kagamhanan sa Dakbayan sa Sugbo, Mandaue, Lapu-lapu ug kagamhanan sa Probinsiya sa Sugbo.
Kini human madawat sa mayor ang memorandum order gikan sa MCIAA Board alang sa withdrawal sa mga help desk sa maong tugpahanan.
Matud pa niya nga mahinungdanon ang pagbutang og help desk diha sa airport taliwa ning nasinate nga pandemya aron masiguro nga mokuha sa tanang dokomento ang mga pasahero nga mosulod sa mga siyudad nga moagi diha sa airport.
Gihimong ehemplo ni Chan ang nadiskitaan sa ilang mga personnel nga mga pasahero nga nagdala og peke nga mga dokomento sama sa letter of acceptance ug letter of confirmation.
Gidugang ni Mayor Chan nga wa sila konsultaha sa MCIAA Board kabahin sa maong lakang.
Subay niini mopadala og suwat ang mayor ngadto sa MCIAA board aron pag-awhag kanila nga ibalik ang help desk sa tugpahanan.
"So i will make an appeal to MCIAA nga ibalik ang help desk kay dako kaayo kini og ikatabang kay dili kita makasiguro nga ang tanan nga nanulod nagdala ba og insakto nga dokumento,," dugang pa sa mayor —MEL (BANATNEWS)