CEBU, Philippines — Patay ang usa ka 59-anyos nga lalaki kinsa giingong giatake pagkahuman niya og pakighilawas sa iyang uyab niadtong Miyerkules sa hapon diha sa usa ka beach resort sa Barangay Poblacion, Lungsod sa Compostela.
Ang nahisgutang lalaki minyo kini ug residente Barangay Yati, Lungsod sa Liloan kinsa uban sa 24-anyos nga dalaga nga taga Barangay Canamucan, Lungsod sa Compostela nga giingong iyang uyab. Nangulo sa pagresponde sa maong alarma si Police Patrolman Israel Jugan ug Police Patrolman Rodrigo Durano.
Base sa ilang imbestigasyon giingong nag-abang og kwarto ang nahisgutang lalaki kuyog usab sa nahisgutang dalaga aron mag lingaw-lingaw.
Giingong naghilawas ang duha diha sulod sa kwarto ug human niini giingong ang lalaki kinsa giubo nipahuway kini tungod sa ka kapoy.
Base usab sa imbestigason sa kapolisan giingong ang lalaki nihangyo kini sa iyahang kuyog nga babaye nga magpamasahe.
Ug samtang gipamasahe kini giingong naglisod kini og ginhawa hinungdan nga nagpakitabang ang babaye sa mga staff sa maong beach resort. Ang mga staff dali kining nitawag og ambulansiya sa Lungsod sa Compostela ug gidala ang lalaki diha sa Danao City District Hospital apan gideklara kini sa doktor nga patay na nga naabot sa maong tambalanan.
Nasayran nga ang duha uyab kini sulod na sa duha ka tuig ug ang lalaki giingong adunay sakit sa kasing-kasing ug nakasinati na usab og atake sa wala pa mahitabo ang maong insidente. —BDB (BANATNEWS)