CEBU, Philippines — Gipahigayon na ang clearing operation sa lima ka mga sapa sa Dakbayan sa Sugbo sa tinguha nga malimpyo na kini sa mga estraktura nga nakalapas sa 3-meter easement.
Suma pa ni Cebu City Councilor Jerry Guardo, Chairman sa Committee on infrastructure nga gipatuman gyud nila ang clearing aron masugdan na ang proyekto nga pagpalapad sa kasapaan aron kaminusan ang pagbaha.
Ang clearing operation gipahigayon sa lima ka sapa nga gilangkuban sa Lahug river, Kinalumsan river, Guadalupe river, Bulacao river ug Butuanon river.
“Nagpasalamat lang ta nga ang mga residente nga naa nagpuyo diring dapita daplin sa sapa nisuportar sad sila sa programa sa siyudad unya niboluntaryo ra sab sila sa pagguba sa ilang mga panimay”, segun ni Konsehal Guardo.
Ang Lahug river naa kini nahimutang sa Barangay Tejero ug Tinago ug nasuta nga moabot sa dul-an 70 ka mga panimalay ang naapektuhan.
Paningkamutan sa Cebu City Government nga sulod sa duha ka semana mahuman ang gihimo nila nga clearing operation.
Giklaro sab sa konsehal nga ang mga naapektuhan nakadawat og hinabang gikan sa siyudad. —MEL (BANATNEWS)