Rama magpatabang kang Cimatu ug Go

CEBU, Philippines — Si Bise Mayor Michael Rama sa Dakbayan sa Sugbo magpatabang kang Environment Secretary Roy Cimatu ug Senador Bong Go aron mahatagan og pagtugot nga magpadayon ang mga kalihokan sa Sinulog ilabi na sa ritual showdown karong Enero 17, 2021.

Gani imbetahon usab niya si Cimatu isip usa sa mga special guest sa maong kalihokan aron personal nga makita niini ang ipatuman unya nila nga health protocols.

Si Rama nihangyo sa kapolisan ug sa Inter-Agency Task Force nga unta tugtan sila nga makapadayon sa gihan-ay nila nga mga kalihokan.

Sayo pa, ang kapolisan nirekomendar nga dili nalang ipadayon ang ritual showdown tungod kay usa kini ka mass gathering apan si Rama wala mo uyon niini.

Matud ni Rama nga imbes ipakanselar  labing maayo nga motabang nalang ang kapolisan ug IATF sa pagpatuman sa kahapsay sa Sinulog Festival.

Giklaro ni Rama nga 99 porsyento sa mga kalihokan sa Sinulog ubos sa virtual hinungdan nga nakugang siya sa rekomendasyon sa kapolisan.

Nagkanayon si Rama nga ipahigayon sa usa ka bahin sa South Road Properties nga  adunay 300 ka ektarya ang gilapdon sa luna ang maong kalihokan ug siguradong mapatuman niini ang social distancing.

Gibutyag ni Rama nga niabot ngadto sa 62 ka panagtigom ang napahigayon kalabot sa Sinulog hinungdan nga lapad ang preparasyon nga ilang nabuhat ilabi na ang pagsiguro nga malikay ang katawhan sa transmisyon sa COVID-19. Sa laing bahin, pagsul-ob sa facemask sa tanang higayon sa dancers ang lakip sa guidelines atol sa ilang pag-apil sa Sinulog 2021 ritual showdown. — Sanden J. Anadia ug Rowena D. Capistrano/BDB   

Garcia, 12  ka opisyal  na-cleared sa kasong graft and corruption

Gibasura sa Office of the Ombudsman ang criminal charges batok lang Cebu Governor Gwendolyn Garcia ug siyam ka opisyal sa Probinsiya sa Sugbo kalabot sa pagtukod sa Cebu International Convention Center (CICC) nga nahimutang diha sa Siyudad sa Mandaue.

Base sa disisyon niadtong Disyembre 14, 2020 nga gipirmahan ni Ombudsman Samuel Marites nagkanayon nga si Garcia ug ang siyam ka opisyal wala makahatag og “undue injury” hilabina ngadto sa gobiyerno sa katukoran sa CICC.

Ang Ombuds niadtong tuig 2016 nakakita kini og igong basehan sa kaso batok sa mga opisyal sa gobiyerno.

Niadtong higayona si Ombudsman Conchita Carpio Morales maoy nimando sa filing sa information sa kasong graft ngadto sa Sandiganbayan apan karon gi-overturn sa Ombudsman ang unang desisyon niini.

“Nevertheless, this office finds sufficient basis to overturn its previous issuance and dismiss the charges against the respondents”, tipik sa 12 ka pahina nga desisyon sa Ombudsman.

Si Garcia ug sila si Provincial Treasurer Roy Salubre, kanhi hepe sa Provincial General Services Office Bernard Calderon, kanhi Provincial Attorney Marino Martinquilla, kanhi Provincial Development Officer Adolfo Quiroga, kanhi Provincial Veterinarian Necias A. Vicoy Jr., IPHO Head Dr. Cristina Giango, Provincial Budget Officer Emme Gingoyon, kanhi PENRO Chief ug karon Pinamungajan Mayor Glenn Baricuatro, kanhi Provincial Engineer Eulogio Pelayre, ug mga miyembro Bids and Awards Committee nga maoy responsable sa pagtukod sa CICC na-cleared sa kasong kalapasan sa Section 3 (e)  Republic Act No. 3019 kun “Anti-Graft and Corrupt Practices Act”.

Ang P800 milyones nga CICC nga gitukod niadtong 2006 wala na kini magamit sa Kapitolyo human nga nadaot usab kini sa bagyo niadtong tuig 2013.

Ang maong edipisyo nabaligya na sa Kapitolyo ngadto sa Dakbayan sa Mandaue ubos sa administrasyon ni kanhi gobernador ug karon Bise Gobernador Hilario Davide III. —BDB (BANATNEWS)