CEBU, Philippines — Nakadawat og pinansiyal nga hinabang nga nagkantidad og P1,000 gikan sa buhatan sa City Social Welfare and Development Office (Department of Social Welfare and Development (DSWD) 7 ang mga pamilya sa Dakbayan sa Mandaue nga naepektuhan sa nasinati nga pagbaha niadtong miaging Oktobre 2020.
Kini gilangkuban sa 3, 600 ka pamilya nga nagpuyo sa 6.5 hectare nga relocation site sa Barangay Paknaan.
Si Kapitan Malaquias Soco miingon nga gawas sa cash assistance nga nadawat sa mga molopyo gihatagan usab sila og mga relief goods.
Samtang sa laing balita, upat ka barangay sa Lungsod sa Consolacion ang nakadawat og P500, 000 ang matag usa kanila nga nagagikan sa buhatan ni 6th District Board Member Thadeo Jonkie Ouano.
Ang mga barangay nga nakadawat sa maong kantidad mao ang Barangay Cansaga, Poblacion Occidental, Lamac ug Tayud.
Si Board Member Ouano, maoy personal nga mihatud sa tseke ug gikuyogan usab sa iyang igsoon nga si Consolacion Councilor Alfie Ouano.
Matud ni Bokal Ouano, nga ang maong pundo gikan sa iyang Legislative Assistance Fund nga gihatag gikan sa opisina ni Governor Gwendolyn Garcia alang sa tuig 2020.
Daku usab ang pasalamat ni Poblacion Occidental Brgy. Kapitan Hercules Aligno sa lungsod sa Consolacion ngadto ni Board Member Jonkie Ouano sa tabang niini tungod kay daku na kini nga tabang sa pagpaayo sa ilang drainage system.
Mga kawani sa barangay nakadawat og pahalipay
Nakadawat og pahalipay ang mokabat sa 1, 040 ka kawani sa barangay sa Dakbayan sa Naga.
Kini maoy agig pasalamat kanila sa ilang tabang sa pakigbatok sa covid-19.
Ang mga kawani sa barangay nga nakadawat ug tag P4, 500 matag usa mao ang mga barangay tanod, health workers, nutrition scholars, lupon ug daycare nga mga kawani.
Si Mayor Kristine Vannesa Chiong ug mga konsehales maoy nangunay sa pagtunol sa pahalipay niadtong Martes. —Gabriel C. Bonjoc/MEL (BANATNEWS)