CEBU, Philippines — Aron mas epektibo ang pagsanta sa pagkatap sa Covid-19 gidasig sa mga opisyal sa siyudad sa Naga ang mga purok leaders sa dakbayan nga padayonon ug seryusohon ang pagtuman sa mga health protocols bisan og duha nalang ang aktibo nilang kaso.
Si Ruth Bandola-Alinsonorin, Public Information Officer (PIO) nakigtigom sa tanang lider sa purok ug gipasiugdahan ang action planning.
Gitudloan ang mga lider kung unsaon paghan-ay sa plano aron mao kini ang gamiton sa ilang mga purok. Matud pa ni Alinsonorin nga gusto ni Mayor Kristine Vannesa Chiong nga manginlabot ang purok leaders sa pagpasunod sa health protocols diha sa ilang purok.
Lakip nga ilang gibalik-balik sa pagpahinumdom mao ang pagpadayon sa kampanya batok sa corona virus disease.
Ang pagsul-ob og facemask, social distancing ug uban pa nga health ug safety protocols ila gihapon nga gihimug-atan samtang niatubang na sa new normal.
Sa pikas bahin, ang Central Visayas nakatala og dugang 11 ka bag-ong kaso base sa Disyembre 6, 2020 nga datus sa Department of Health. Ang tulo niini gikan sa syudad sa Sugbo, duha sa Mandaue, ug tag tulo ang Probinsya sa Sugbo ug Negros Oriental. Hinungdan nga anaa sa 937 ang active cases sa Covid-19 sa Rehiyon 7 human usab nga unom ang nadugang sa mga naayo nga sa Probinsya sa Sugbo.
Ang Cebu City karon duna nay 9,799 nga nangaayo apan nadugangan og usa ang mga nakalas ug karon niabot na og 687, kini gikan sa kinatibuk-ang natala nga kaso nga 10,684 gikan sa pagsugod sa pandemiya.
Ang Mandaue City dunay 66 active cases sa COVID-19 gikan sa 2,666 total cases sa siyudad human duha ang natala nga bag-ong kaso.
Samtang 2,430 niini ang nangaayo na apan dunay usa nga nadugang sa talaan sa mga namatay ug karon miabot na og 170.
Ang Central Visayas duna na karoy natala nga 24, 301 apan ang 21, 971 niini nangaayo na ug 1, 393 ang natala nga namatay sukad nga nagsugod ang pandemiya.
Sa Lapu-Lapu City, ang ilang City Epidemiologist nga si Grace Carungay miingon nga 16 sa 30 ka barangay sa siyudad wala nay natalang bag-ong kaso sa coronavirus ning buwana.
Kini mao ang Pusok, Marigondon, Canjulao, Buaya, Puna Ingaño, Suba-Basbas, Tingo, San Vicente, Talima, Sta. Rosa, Sabang, Caw-oy, Baring, Tungasan, Pangan-an ug Caohagan.
Ang dakbayan duna na lamang 97 ka mga aktibong kaso sa virus. —Le Phyllis F. Antojado, Romeo Limpangog/IBM (BANATNEWS)