Mga sapa gustong palawman ni Garcia
CEBU, Philippines — Dili momenus P55 milyones ang kadaot sa agrikultura ug imprastraktura sa grabeng baha nga nasinati sa pipila ka barangay sa lungsod sa Tuburan matud sa Local Disaster Risk Reduction and Management Office sa lungsod.
Si Richard Hernandez ang hepe sa maong buhatan miingon nga P15 milyones kadaot sa agrikultura ug mga binuhing hayopan. Naapektahan og maayo ang mga kasagingan, mais, humay ug uban pang lagutmon.
Samtang anaa sa mga P40 milyones ang kadaot sa imprastraktura. Sa 54 ka barangay sa Tuburan , 20 ka mga barangay ang naapektahan.
Ang lungsod sa Asturias ug Balamban padayon pa ang gihimong assessment kon pila ang danyos sa ilang lungsod.
Si Gobernador Gwendolyn Garcia nisuroy sa mga lugar nga naapektohan sa baha. Una niyang giadto ang Balamban diin duha ka barangay, ang Nangka ug Cantuod ang nabahaan human niawas ang Balamban River.
Nakita niya nga adunay bahin sa flood control project ang naguba na. Gimandoan niya ang Provincial Engineering's Office ug Provincial Environment and Natural Resources Office (PENRO) pag-survey sa sapa alang sa pagpahigayon og dredging aron palawman ang sapa.
Gisusi usab ni Garcia ang Guinabasan River sa Asturias nga usa sa nilawom na ang tubig atol sa pag-ulan apan wala ra hinoon moawas.Kataposang gibisita ni Garcia ang lungsod sa Tuburan ug giadto sab niya ang Languyon River. Ang gobernador makittagbo ni sa taga DPWH ug sa mga possible contractors alang sa ipahigayon nga dredging. —IBM (BANATNEWS)
- Latest