CEBU, Philippines — Ang dakbayan sa Sugbo nakagasto na og dili momenus P2.1 bilyones ka pesos alang sa Covid-19 response niini sukad sa pagsugod sa pandemiya hangtud niadtong Oktubre 16, 2020 matud sa usa ka city official.
Si Konsehal Raymond Alvin Garcia, chairman sa Committee on Budget and Finance sa konseho miingon nga kini nga kantidad gikan sa dili momenos P3.4 bilyones nga kinatibuk-ang source of funds.
Matud sa datos nga gihatag ni Garcia, ang siyudad adunay lima nga gigikanan sa maong pundo. Kini ang Supplemental Budget 2, Supplemental Budget 3, duha ka trust funds, ug ang capital outlay sa disaster.
Di momenos P1.006 bilyones ang nagasto gikan sa Supplemental Budget 3 nga naa sa P1.9 bilyon.
Samtang ang sa Supplemental Budget 2 nga naa sa P1 bilyon, di momenos P899 milyon ang nagasto na. Sa unang trust fund nga nagkantidad og P15 milyones, dili mokubos sa P14.4 milyon ang nagasto na; samtang sa ikaduhang trust fund nga nagkantidad og P302.6 milyones, dili moubos sa P167 milyones na ang nagasto.
Dili moubos sa P85.5 milyones ang nagasto gikan sa capital outlay nga naa sa P116 milyones.
Apil sa gitawag nga COVID expenses mao ang P500 milyones nga alokasyon alang sa Cebu City Medical Center ug ang P300 milyones nga alang sa mga rehistrado nga senior citizens sa dakbayan.
“Daghan pa man ni’g on process pa nga purchase order,” pasabot pa ni Garcia. Sumala pa niya duna pay paigong nahibiling pundo para sa COVID-19 response sa siyudad karong tuiga.
Sumala pa ni Garcia, kadtong pundo nga dili magamit ibalik kini sa general fund sa dakbayan.
Kahinumdoman nga ang mga konsehal sa dakbayan nangita na sa kwentada sa nagasto sa siyudad bahin sa Covid-19 response niini aron maoy basehan sa pagtagana og pundo alang sa Covid-19 sa sunod tuig.
Ang Konseho nituki na sa budget hearing alang sa sugyot nga P10.8 billion budget alang sa tuig 2021.
“We will extend ‘till next week so that all the departments can present and then, aside from that, there were some departments who wala masatisfy ang committee nga we wanted them to present again,” si Garcia mipasabot.— IBM (BANATNEWS)