CEBU, Philippines — Nadakpan atol sa managkalahing buy bust operation sa kapolisan sa Presinto 5 sa Lapu-Lapu City Police Office (LLCPO) ang lima ka suspetsadong pusher og shabu.
Si Police Captain Airbert Jay Samson hepe sa Presinto 5 niila sa ilang nadakpan nga sila si Reynan Cuizon, 25-anyos, taga Daanbantayan, Zorrel Mariñas, 39, Hadjie Igot, 24, construction worker ug pulos nagpuyo sa Zone 3, Barangay Buaya, Dakbayan sa Lapu-Lapu, Darryl Caballero, 41 ug Catherine Van Dervies, 36, pulos taga dalan M. J. Cuenco Avenue, Barangay Carreta sa Dakbayan sa Sugbo.
Nasakmit sa kapolisan gikan sa mga suspetsado ang shabu nga nagkantidad tanan ngadto sa P35,000 ug buy bust money. Ang kapolisan nakadawat og report kabahin sa giingong ilegal nga kalihukan sa mga suspetsado hinungdan nga nipahigayon sila sa nahisgutang operasyon.
Ang mga suspetsado natingkagol karon sa detention cell sa LLCPO ug gikatakda nga pasakaan og tukmang kaso sa nahimo nilang kalapasan. —/BDB (BANATNEWS)