CEBU, Philippines — Sulod lang sa usa ka semana nga pagpatuman sa truck ban ug clamping dul-an sa 200 ka drayber ang nadakpan nga nakahimo og kalapasan niini sa Dakbayan sa Talisay.
Kini ang gibutyag ni Jonathan Tumulak, hepe sa City of Talisay-Traffic Operation and Development Authority (CT-TODA).
Matud ni Tumulak nga hinay-hinay nila nga gibalik ang mga silot sa mga badlongon nga drayber aron maibanan ang kahuot sa dagan sa trapiko sa siyudad samtang nag-atubang na ngadto sa new normal nga pagpuyo.
Sa truck ban 160 ang ilang nadakpan ug laing 37 ka sakyanan ang na-clamping.
Ang unang kalapasan sa truck ban aduna kini P1,500 nga multa; P2,000 sa ikaduhang kalapasan ug P5,000 sa ikatulong kalapasan.
Samtang sa clamping P500 ang multa niini.
Dugang ni Tumulak nga kadtong mga magpataka og parada sa ilang sakyanan o motorsiklo angay na gyud magtimaan sa lagda aron dili mahasol sa ilang mga lakaw. /BDB (BANATNEWS)