Ubos nga budget sa Sinulog 2021

CEBU, Philippines — Gipaabot nga mas ubos ra ang budget sa umaabot nga Sinulog 2021 sa Dakbayan sa Sugbo kun ikomparar sa nanglabay nga katuigan tungod sa covid-19 pandemic.

Kini ang gitug-an ni Vice Mayor Michael Rama ug suma pa niya nga gumikan kay gamay ra man ang mga kalihukan, gamay lang usab ang budget nga gikinahanglan.

Sumala pa usab sa bise mayor nga dili maayo ang dagan sa ekonomiya ug dili angayan nga mogasto ug daku.

Aduna nay giplano nga mga kalihukan ug lakip niini mao ang sinulog nga ipahigayon sa South Road Properties, Sinulog sa Kabataan, Sinulog sa Dakbayan ug Sinulog sa Barangay nga ila pang gitun-an. Gilantaw usab ang virtual parades atol sa maong kalihukan diin ang premyo sa mga contingents possible nga maapektohan. Gipaabot nga makaminos ang siyudad sa travel expenses, base sa plano nga virtual parades, tungod kay ang mga out of town contingents dili na kinahanglan mobyahe tungod sa travel restrictions.

Gipaniguro ni Rama ngadto sa publiko nga ang lokal nga kagamhanan magmatngon sa ilang paggasto sa kwarta gikan sa panudlanan alang sa maong kalihukan ilabi na karon nga nag-atubang kita og krisis sa ekonomiya. /MEL (BANATNEWS)