CEBU, Philippines — Dako gayod ang epektong nahimo sa coronavirus disease 2019 sa mga pribadong tulunghaan diha sa Dakbayan sa Lapu-Lapu human nga napulo ka pribadong tunghaan ang temporaryong nanirado alang sa tuig 2020-2021.
Samtang ang usa niini kanila nakahukom nalang sa permamenteng paghunong sa ilang operasyon.
Si Dr. Marcelita Dignos nga maoy Assistant Superintendent sa Department of Education (DepEd) Lapu-Lapu City Schools Division mibutyag nga kining maong mga pribadong tulunghaan nakadesisyon nga manirado karong tuiga tungod kay gamay ra kaayo ang nagpa-enroll karong tuiga.
Sa pagsirado niining maong mga tunghaan, napun-an sab ang gidaghanon sa mga tinun-an sa publikong mga tunghaan sa siyudad.
Subay sa ilang natala sa pagkakaron moabot 101,976 ka tinun-an ang nagpa—enroll sa public schools karong tuiga 2020, samtang anaa lamang sa 9,802 ka mga tinun-an ang nagpa- enroll sa private schools.
Sa miaging tuig 2019, ang public schools sa Lapu-Lapu duna lang kinatibuk-ang 99,053 ka mga tinun-an samtang 24,066 usab ang sa private schools. /IBM (BANATNEWS)