CEBU, Philippines — Ipaubos sa swab test ang mga construction workers nunot sa gikatahong pagsaka sa kaso sa coronavirus disease sa maong mga trabahente.
Kini ang nasabutan sa kadagkuan sa Emergency Operations Center, Cebu Contractors Association, Department of Public Works and Highways ug Department of Engineering and Public Works, atol sa tigum nga gipatawag ni Konsehal Joel Garganera.
Si Garganera kinsa maoy deputy chief implementer sa EOC, nibutyag nga ang lokal nga kagamhanan maoy moabaga sa pagpahigayon og swab test samtang ang contractor maoy mohatag sa tanang panginahanglan sa mga trabahante dili lang sa mga magpositibo apan lakip sa mga mahimong subject sa contact tracing ug sa mapaubos sa lockdown.
Natuki sab ang hangyo sa mga contractors nga mapaabot ngadto sa Land Transportation Office ug Cebu City Transportation Office nga makagamit sa ilang mga sakyanan de karga aron mahimong masakyan sa ilang mga trabahante nga mosunod gihapon sa tanang health protocols.
Dugang pa ni Garganera nga ang CCA ang mohatag sab sa contact numbers lakip usab sa mga health officers nga maoy motutok sa tanang construction sites, staff house ug barracks house.
Gikataho ang upat ka construction workers nga nagpositibo sa COVID-19 diin adunay 126 ka close contacts ug 16 ang nigawas nga positibo, 59 ang nagnegatibo ug adunay 49 ang nagpaabot pa sa ilang swab test.
Sa laing bahin, gibutyag ni Cebu City Police Office director, Police Colonel Josefino Ligan, nga moabot na sa 170 ka sakop sa Task Force K.A.S.A.L.I.G.A.N ang ni-report na sa trabaho human usa nalang ang pabiling gi-isolate sanglit nagpaabot pa sa resulta sa swab test. Matud ni Ligan nga ang Task Force K.A.S.A.L.I.G.A.N anaa sa Barangay Apas gibutang sanglit ang maong barangay maoy may daghang kaso sa COVID-19.
Sila ang mopatuman sa one-meter distance ug ubang minimum health protocols.
Ang Dakbayan sa Sugbo nakatala og 14 ka bag-ong kaso sa COVID-19 ug tulo ang nakarekober base sa talaan sa Department of Health - Central Visayas niadtong Domingo, Septiyembre 20.
Sa kinatibuk-an, ang dakbayan aduna nay 9,895 ka kaso diin 388 niini ang active cases ug ang total recoveries anaa sa 8,842 samtang nagpabilin nga 665 ang tanan namatay human walay bag-ong nakatala.
Namatikdan nga nisaka pagbalik ang active cases sa COVID-19 sa Central Visayas base sa maong talaan.
Kini human adunay natala ang DOH-7 nga 54 ka bag-ong kaso samtang 19 ra ang bag-ong nangaayo.
Gawas sa Dakbayan sa Sugbo, ang DOH-7 nakatala sab og 11 ka bag-ong kaso sa Dakbayan sa Lapu-Lapu, walo sa Dakbayan sa Mandaue, ug 21 sa Probinsiya sa Sugbo.
Ang total recoveries sa COVID-19 sa Central Visayas niabot na sa 17,491 samtang 1,242 ang natala na nga namatay human nadugangan kini og duha.
Sa kinatibuk-an, ang Central Visayas duna nay 20,413 ka kompirmadong kaso sa COVID-19. - Decemay P. Padilla ug Le Phyllis F. Antojado/GMR (BANATNEWS)