Seniors sa Talisay tugotan makasimba

CEBU, Philippines — Mahimo na nga makagawas ang mga senior citizen sa ilang pinuy-anan karong panahona. Apan giklaro sa kapulisan sa Dakbayan sa Talisay nga gikinahanglan una sila nga mokuha og special pass gikan sa ilang barangay.

Si Police Major Gerard Ace Pelare, pangu sa Talisay City Police Station nagkanayon nga ang special pass magamit lang kung mosimba ang mga edaran. Gihimo kini sa mga opisyales sa Talisay labot sa nagsingabot nga kapistahan karong Oktubre 15 ning tuiga. Ang Talisay padayon nga gipaubos sa Modified General Community Quarantine (MGCQ) apan estrikto gihapon ang pagpatuman sa health protocols.

Gidid-an gihapon ang mga menor de edad nga makagawas sa panimay ug padayon ang kapulisan ug barangay tanod sa pagpanakop sa mga tawo nga magpabadlong ug dili motuman sa health protocols. /IBM (BANATNEWS)