CEBU, Philippines — Dul-an 100 ka mga bag-ong pusa sa itlog nga mga pawikan ang malampusong nakabalik na sa kadagatan nga gisaksihan sa molupyo diha sa sitio San Juan, Brgy. Inayagan, Dakbayan sa Naga kagahapon buntag.
Si Joel Matoza nitug-an sa Banat News nga ang iyang silingan nga si Neth Repunte Gevero mao gyud ang nakabantay sa mga gagmay nga pawikan nga sa una nilang pagkakita abi nila og mga baki.
Sa ilang pagsusi pawikan diay kini nga naglumba og panggawas sa balas ug hinayhinay nga nikamang padung sa dagat. Tungod niini nanawagan sa mga silingan silan Gevero.
Gitabangan sa mga tawo paglungag ang dapit diin gikan ang mga pawikan ug gibalhin silang tanan sa palangana, ug pagkahuman gibuhatan og agianan ang mga gagmay nga pawikan padung sa dagat aron dili na magliko-liko ug masaag.
Matud pa ni Matoza niadtong bulan sa Hulyo, ang pamilyang Repunte nakamatikod sa kasikas sa gawas sa ilang balay usa ka gabii niana ug sa ilang pagsusi pawikan diay kini nga daw nagluya apan diay to nangita og dapit aron mangitlog. Ila lang kining gipasagdan hangtud nga nibalik kini sa kadagatan.
Apan paglabay sa duha ka buwan naposa ang mga itlog niini ug sa ilang pag-ihap miabot kini og 96 ka mga pawikan.
Ubos sa mga balaod sa Pilipinas ug sa international laws nga giuyonan sa mga kanasuran gidili ang pagkuha, pagpatay ug pagbaligya sa tanang matang sa pawikan.
Protektado sab kini sa Convention on International Trade in Endangered Species of Wild Fauna and Flora (CITES) nga nagdili sa tanang commercial trade niini.
Ang mopasipala sa mga pawikan dinhi sa Pilipinas mahimong mapriso og di momenus 12 ngadto sa 20 ka tuig. /IBM (BANATNEWS)