Fort San Pedro gibuksan og balik

Cebu, Philippines — Pormal na gibuksan og balik kagahapong adlawa sa kagamhanan sa Dakbayan sa Sugbo ang Fort San Pedro apan dili na parehas kaniadto 50 porsiyento lang sa kapasidad niini ang tugotang makasulod matud pa sa tigpamaba ni Mayor Edgardo Labella nga si Atty.  Rey Gealon.

Sa pakighinabi sa Banat News ngadto executive director   sa Fort San Pedro nga si Erwin dela Cerna  nibutyag kini nga gikan sa 400 ka tawo nga kapasidad,  200 nalang mahimong makasulod niini.

Kahinumdoman nga unom ka buwan kini nga gisirhan gumikan sa pandemya.

Ang maong tourist site natukod niadtong tuig 1565 sa panahon sa mga Espanyol.  Ang maong makasaysayanong atraksyon sa mga turista nahimo ng paboritong venue sa pipila ka nagpakasal.

Nitambong sa pagbukas ang mga opisyales sa siyudad sa Sugbo pinangulohan ni Cebu City Mayor Edgardo Labella, Department of Tourism -7 Director Shalimar Hofer Tamano ug uban pa.

Sa wala pa ang COVID-19 pandemic ang Fort San Pedro dayuhon kanunay sa mga turista langyaw man o lokal apan nahunong ang operasyon sugod niadtong buwan sa Marso hangtod sa Agosto tungod sa pandemiya.

Giklaro ni Erwin Dela Cerna executive director sa Fort San Pedro  nga ipatuman gihapon nila ang minimum health protocols, mag-logbook sab diin ibutang ngalan, address ug contact number ug dunay alcohol nga i-andam ra sa pag-sanitize ug disinfect sa mga turista. Sa mga gustong mosuroy sa Fort San Pedro ang entrance fee niini anaa sa P30, abli kini gikan sa alas-8 sa buntag hangtod sa alas- 5 sa hapon.

Apan wala pa matino kun mga lokal ba o mga langyaw lang nga turista maoy tugotang makasuroy sa maong suroyanan sanglit ang siyudad ubos pa gihapon sa modified general community quarantine ug gidili ang paggawas sa balay kun dili importante ang tuyo.

Bawal pa

Sa pikas bahin, wala ray problema kang Labella ang pagdili ni Gob. Gwendolyn Garcia sa mga residente sa Cebu City pagbisita sa tourist destinations sa  probinsya kay matud sa mayor bisag ubos sa MGCQ ang siyudad, nagpabilin gihapon ang kwarantinas.

Nagkanayon ang mayor nga pagpalit og mga nag unang  panginahanglanon ug pagtrabaho mao ra ang gitugotan nga makagawas karong panahona.

"I have no problem because in my executive order I always emphasize that when we are on quarantine, regardless of the classification, the basic requirement is for you to stay home and you are only allowed to stay out of your home to buy essential goods for your essential needs," matud ni Labella.

"Now, I think going to tourist destination is not an essential need of a resident of the City of Cebu," dugang pa niya. (BANAT NEWS)