CEBU, Philippines — Si Mayor Junarad Ahong Chan sa Dakbayan sa Lapu-Lapu ang makigtagbo sa mga tagdumala og establisamento sa Mactan Export Processing Zone (MEPZ) nga nanaktak sa ilang mga trabahante tungod sa epekto sa COVID-19.
Kini human nga nidangop ngadto kaniya ang maong mga trabahante ug nangayo og panabang.
Matud ni Chan nga usa sa iyang pagahimuon nga lakang mao ang paghangyo nga pun-an ang nadawat nga separation pay sa mga nataktak nga trabahante.
Giingong ang mga kompaniya nga gitrabahoan sa maong mga kawani wala motuman sa gikasabotan niini tali sa ilang mga empleyado nga ang bayad sa ilang separation pay sa matag tuig nilang serbisyo bali og 30 ka adlaw o usa ka buwan nilang sweldohan.
Apan giingong ang mga nadawat sa empleyado nga separation pay bali og 15 ka adlaw o tunga sa buwan lang nila nga sweldo sa matag tuig nilang serbisyo.
Gitinguha usab ni Chan nga ang maong mga kawani nga natangtang na sa ilang trabaho ang matabangan nga makasulod og laing trabaho pinaagi sa Pubic Employment Office (PESO) sa siyudad.
Sa nasayran, kapin sa 4,000 ka trabahante sa mga establisamento sa MEPZ sa Dakbayan sa Lapu-Lapu ang gitaktak sa ilang trabaho diin ang maong mga kompaniya naapektohan sa COVID-19 ug ang operasyon niini nahunong sukad niadtong buwan sa Marso niining tuiga. /BDB (BANATNEWS)