CEBU, Philippines — Gitinguha ni Mayor Jonas Cortes ang upat ka adlaw nga temporaryo nga pagsirado sa mga sam-ang sa Dakbayan sa Mandaue.
Subay niini gipaabot nga mopagawas ang mayor og executive order nga naglatid sa mga adlaw sa pagsira ingon man sa subli nga pagbukas sa mga sementeryo.
Tinguha ni Mayor Cortes nga sirad-an ang mga pribado ug publiko nga menteryo sugod Oktobre 30 hangtud sa Nobyiembre 4, 2020.
Ang maong tinguha sa mayor nakab-ot human masuta ang ka peligro sa pagkatap sa coronavirus disease sa higayon nga itugot ang pagdagsa sa mga tawo panahon sa pagsaulog sa Todos Los Santos o Adlaw sa mga Kalag sa Nobyimbre 1 ug 2, 2020.
Si Atty John Eddu Ibañez executive secretary ni Mayor Cortes mipasabot nga tumong sa temporaryong pagsira sa mga sementeryo mao ang paglikay nga mosaka og balik ang gidaghanon sa kaso sa COVID-19 sa ilang dakbayan.
Nunot niini gidasig ni Ibañez ang katawhan nga moduaw og sayo sa mga menteryo ug dili na paabuton ang kalag-kalag una mobisita sa lubnganan sa ilang mga mahal sa kinabuhi nga mitaliwan na. /MEL (BANATNEWS)