CEBU, Philippines — Nakasabot ra ang Artsidiyosisis sa Sugbo sa pagdili ni Cebu City Mayor Edgardo Labella nga maduaw sa mga tawo ang mga sam-ang sa siyudad sugod karong Oktubre 30 hangtud sa Nobiyembre 3,2020.
Si Labella mipagawas sa maong kamandoan aron paglikay nga dili magdasok ang mga tawo sa mga sam-ang tungod sa novel coronavirus disease nga posibleng magkatinakdanay ang mga tawo.
Nagkanayons si Father Japeth Geonzon, Vice Chair sa Commission on Worship sa Archdiocese of Cebu miingon nga ang maong lakang sa kagamhanan pagpakabana sa kaayuhan sa tanan.
Ang Cebu Metropolitan Cathedral usa sa mga nagdumala sa usa ka bahin sa Carreta Cemetery nga usa sa kinadak-ang sam-ang sa siyudad.
“As of now upon hearing the Executive Order sa atong talahurong Mayor mao na nga kami wa gyud magdumili pagtuman niiini, pagsunod niini so sa among nakita there must be a wisdom nganong ingon ana iyahang gi-anticipate kay of course labi na kitang mga Pinoy ang kamatayon kinaiya nato naay close family ties nga kinaiya,” sigon ni Fr. Geonzon.
Bisan pa man niini, ang Simbahan mipahibalo nga modawat gihapon sila og mga buot magpamisa sa mga minahal a sa kinabuhi nga mitaliwan na.
“Kining makahalad gihapon og mga pamisa kay ang mga misa sa simbahan nagpadayon man so dili ta angay maguol kay even in our homes, even in our house makahalad ta og pag-ampo sa atoang mga minahal sa nag-una kanato, nitaliwan na,” dugang ni Fr. Geonzon.
Samtang si Labella mimando na siya sa pangulo sa Department of Social Welfare and Services nga mohimo og assessment sa mga sam-ang ilabi na kadtong mga dagko sama sa Carreta, Calamba, Mabolo, Bo. Luz ug Pardo.
Gusto sa mayor nga pahatagan og mga hinabang sama sa bugas, delata ug uban pa ang mga nanginabuhi diha sa mga sam-ang nga nagpaabot sa Adlaw sa mga Santos ug sa Kalag-Kalag aron mokita.
“Kay niingon man sila tungod sa atong pagsira sa mga cemeteries sa petsa 1 ug petsa 2 naapektahan gyud ang ilahang panginabuhi mao na ato silang hatagan og hinabang bugas ug delata but they have to be properly identified through the DSWS ug sa atong mga barangays nga naa diha ang menteryo,” ni Labella pa. Rowena D. Capistrano/IBM (BANATNEWS)