CEBU, Philippines — Ang Cebu City, Mandaue City, Lapu-Lapu City magpabilin ubos sa general community quarantine (GCQ) gikan sa Agosto 16 hangtod 31, 2020 subay sa pahibalo kagahapon sa Malacañang.
"That's also what we want to happen, that we will maintain the GCQ status," sigun ni Mayor Edgardo Labella.
Ubos sa GCQ, ang mayor nag-ingon nga adunay kontrol sa kalihukan sa mga tawo, adunay mga pipila nga mga pagdili, ug ang mga tawo usab padayon nga imonitor.
Gipasabot ni Labella nga ang hugot nga pagpatuman sa quarantine protocols ug minimum health requirements magpabilin. Ang mga QR-coded quarantine pass magpabilin nga epektibo.
"There are still restrictions because let us always remember that we are still on quarantine. Quarantine means stay home and we only go out if there is a need to buy essential goods, commodities, and medicines," ingon ni Labella.
"The virus is still very much around. We cannot be complacent. We cannot take things for granted," dugang pa niya.
Giawhag ni Labella ang publiko nga magpabiling mabinantayon, mosunod sa minimum health requirements, ug kanunay hinumdoman nga ang sukaran nga lagda sa panahon sa quarantine mao ang "stay at home."
"At least businesses are open on a regulated basis. Anam-anam lang. Hinay-hinay lang. We have to take care of the gains that we have achieved. We should not jump abruptly to a less control, less restriction. We should avoid nga mabalik ta sa ECQ or sa MECQ," dugang sa mayor.
Hinuon ang National Task Force for Covid-19 miingon nga bisan og GCQ, aduna gihapoy mga dapit nga mapaubos sa mga lockdowns o granular lockdowns kun dunay daghang kaso sa ilang lugar.
“Lilinawin ko po, maski sa mga lugar na nasa ilalim na ng GCQ at pati na yung nasa ilalim ng MGCQ, magkakaron pa rin po tayo ng localized ECQ.So wala po talagang katapusan ang ECQ,Ngayon, localized or granular,” matud pa sa tigpamaba sa Malacañang nga si Sec. Harry Roque.
Sa pagkakaon, lima ka barangay sa Cebu City ang bag-ohay lang gilibkasan og lockdowns human nga nakita nga negatibo na sa virus ang ilang mga dapit. Kini gikan sa Mabolo, Guadalupe, Quiot, Tisa, ug Labangon. Duna say mga establisamentong gi-lockdown tungod sa mga kalapasan sa health protocols.
Ang granular lockdown kun duha o daghang panimalay ang gidudahan o ba kaha nakompirmar nga dunay positibo sa virus, samtang ang mga establisamento mandoan sa pagsira aron mag- decontamination ug contact tracing sud sa 24-oras o hangtud kanus-a sila tugotan makapangabli sa mga otoridad.
Subay sa talaan sa Cebu City gikan sa DOH-7 sa ilang Agusto 14 nga talaan, duna kini 1,647 aktibong kaso human nadugangan og 29 ka bag-ong kaso ug walo sab ang nakalas.
Hinuon kining walo nga nakalas, wala sila namatay sa usa lang ka adlaw, ang uban kanila niadto pang Mayo 13 apan naberipika lang niadtong adlaw nga Biyernes.
Gawas sa Cebu City, Mandaue ug Lapu-Lapu lakip sa magpabilin sa GCQ mao ang Talisay City, Minglanilla ug Consolacion, samtang ang uban nga ubos na sa modified GCQ magbilin gihapon hangtud Agosto 31.
Si Mayor Junard "Ahong" Chan sa Dakbayan sa Lapu-Lapu mihangop sa pagpabilin ubos sa GCQ ilang siyudad ug pinaagi niini ilahang paningkamotan nga mokubos pa gyud ang gidaghanon sa mga matakboyan sa maong sakit hangtud nga kini mawala. —Caecent No-ot Magsumbol, Rowena Capistrano/IBM (BANATNEWS)