Sitio lockdown libkason

CEBU, Philippines — Sa dili madugay malibkas na ang granular lockdown sa Abellanosa Compound sa Sitio Kalubihan, Barangay Quiot, Dakbayan sa Sugbo.

Matud ni Konsehal Joel Garganera, deputy chief implementer sa Inter-Agency Task Force (IATF) Emergency Operations Center (EOC) Cebu City, nga naghuwat nalang sila sa pag-uyon sa sa Regional IATF.

Si Barangay Kapitan Francis Esparis una na nga namahayag nga usa ra ang nagpositibo sa lugar ug nahuman na sab kini sa quarantine period ug ang mga tawo nga naapil sa contact tracing negatibo ang resulta sa swab test.

Ubang mga lugar nga gipaubos sa granular lockdown mao ang Sitio Eyha, Guadalupe; Balaga Drive paingon sa Sitio Cekalco, Labangon; Tuada Compound, Tisa; Sitio San Isidro, Quiot; ug C. Mina Extension, Mabolo.

Si Garganera niasoy nga padayon ang medical intervention nila sa maong mga lugar ug nagpaabot gihapon sila sa resulta sa contact tracing ug swabbing.

“Once mahuman nana siya then we’ll make the necessary recommendation for the lifting just in case if safe na ang ilahang lugar, the ambiance,” sigun ni Garganera.

Sa 80 ka barangay sa Dakbayan sa Sugbo, matud ni Garganera nga sa 57 niini ang dunay active cases samtang naa sa 23 ang wala’y active cases.

Minus nangadakpan

Samtang ang Cebu City Prevention Restoration Orderly Beautification Enhancement (PROBE) Team nibutyag nga nagkakubos ang gidaghanon sa mga malapason sa lagda sa quarantine sa nilabay nga duha ka adlaw.

Matud ni Raquel Bohol-Arce, hepe sa PROBE, nga gikan sa Lunes hangtud Miyerkules sa buntag minus ang ilang nadakpan ikomparar sa unang duha ka adlaw sa pagpaubos sa siyudad sa general community quarantine nga niabot gyud og kapin 1,000 ka tawo.

Sumala pa ni Arce nga moabot nalang karon sa 100 ka tawo ang nadakpan matag adlaw.

Giawhag ni Arce ang katawhan nga dili kalimtan ang pagsunod sa mga quarantine protocols aron dili sila madakpan ug madala sa Plaza Independencia alang sa usa ka seminar.

Daghang nakarekober

Sa lain bahin naa nalang sa 87 ang aktibong kaso sa COVID-19 sa Dakbayan sa Talisay hangtud kagahapong adlawa.

Sa bag-ong kaso, adunay unom samtang 23 ang nakarekober gikan sa Barangay Poblacion, San Isidro, Tapul, Biasong, Maghaway ug Linao.

Sa kinatibuk-an niabot sa 763 ang kaso sa dakbayan diin 599 ang nakarekober ug 77 ang namatay.

Sa Central Visayas, sobra na sa 10,000 ang nakarekober sa COVID-19 base sa Agosto 5, 2020 nga datus sa Department of Health 7 human 298 ang bag-ong recoveries sa maong adlaw hinungdan nga niabot na og 10,451 ang tanang naayo.

Samtang 93 sab ang nadugang nga bag-ong kaso sa maong adlaw hinungdan nga ang active cases anaa sa 5,507.

Sa mga bag-ong kaso, 25 niini sa Cebu City, 17 sa Mandaue City, siyam sa Lapu-Lapu, 33 sa Cebu Province, upat sa Minglanilla, duha sa Consolacion, ug tulo sa Bohol.

Sa mga active cases 1,507 ang na-admit sa tambalanan samtang 4,000 ang naa sa isolation.

Anaa usab sa 918 ang mortality gikan sa 16,876 nga cumulative cases sa COVID-19 sa Central Visayas. — Rowena D. Capistrano, Gabriel C. Bonjoc, Le Phyllis F. Antojado/GMR (BANATNEWS)