Garcia: Ibalik ang pagbukas sa ekonomiya
CEBU, Philippines — Si Gobernador Gwendolyn Garcia nagkanayon nga kinahanglan nga ibalik na ang pagbukas sa ekonomiya sa Probinsiya sa Sugbo bisan pa sa padayong pakigbatok sa COVID-19.
Sa “message of hope” ni Garcia atol sa kasaulogan sa ika-451st nga founding anniversary sa Probinsiya sa Sugbo kagahapon nagkanayon kini nga ang pagbangon sa ekonomiya maoy direksiyon sa probinsiya.
“Dunganon ta, samtang panalipdan ta ang tagsa-tagsa ka kinabuhi sa matag Sugboanon, bangunon ta na usab ang inyong panginabuhian kay ang kinabuhi nagkinahanglan og panginabuhi”, matud ni Garcia.
Giawhag ni Garcia ang mga Sugboanon nga magpabilin nga disiplinado ug mosunod sa gipatuman nga health protocols sa Probinsya sa Sugbo bisan og gipaubos na kini sa modified general community quarantine (MGCQ).
Matud ni Garcia nga halos unom na ka buwan nga nagsirado ang mga negosyo ug ang mga gagmay nga patigayon nasira kini ug ubay-ubay ang nawad-an og trabaho.
Ang gobiyerno dili mahimo nga padayon nga mogasto pagsustiner sa lockdown. Kagahapon atol sa nahisgutang kasaulogan gipahigayon ang flag raising ceremony ug gisundan kini sa misa ug human niini si Garcia nipasalamat sa mga opisyal sa Kapitolyo ug tibuok probinsiya kinsa nitabang sa pakigbatok sa COVID-19.
“For as long as this governor stands, and for as long as we have the active support of Vice Governor Junjun Davide and all of our provincial board members, may I tell you all Cebuanos, the state of the province is strong still”, dugang ni Garcia. /BDB (BANATNEWS)
- Latest