Olympic-standard nga pasilidad tukuron sa lungsod sa liloan

CEBU, Philippines — Sa dili madugay makaangkon ang Lungsod sa Liloan og Olympic-standard track oval ug grandstand ingon man Olympic-sized swimming pool sa Barangay Jubay.

Gisugdan na ang pag-ugmad sa luna nga iya sa kagamhanan sa lungsod diin tukuron usab ang Cebu Technological University campus.

Kini isip kabahin sa tinguha ni Kongresista Vincent Franco “Duke” Frasco ug asawa, Mayor Christina Frasco, sa paghatag og tertiary education sa mga konstituwente.

“Mayor Christina and I are ecstatic to begin this project together that will take Liloan to greater heights,” matud ni Kong. Frasco.

Pasiunang budget nga P20 milyones ang nalakip na sa 2020 General Appropriations Act alang sa first phase sa proyekto.

Nahuman na ang bidding nga maoy timaan sa pagsugod na sa daku nga proyekto sa first class nga lungsod.

“It’s the first of its kind in the north,” matud ni Mayor Frasco.

Ang mga lawak ubos sa grandstand ang magsilbing mga classrooms sa CTU extension.

Ang edukasyon mao kanunay ang prayoridad ni Kong. Frasco kinsa diha siya pa ang mayor sa lungsod iyang gipasiugdahan ang scholarship program nga napahimuslan sa liboan ka tinun-an sa 10 ka lungsod ug usa ka siyudad sa ikalimang distrito sa Lalawigan sa Sugbo. – Gregg M. Rubio

Talisay dunay scholarship sa laing kolehiyo

Padayon ang pagpatuman sa “Cream of the Crop Scholarship Program” sa Siyudad sa Talisay bisan sa pandemya nga nasinati nga gipasiugdahan ni Mayor Gerald Anthony “Samsam” Gullas Jr.

Matud ni Gullas nga sa wala pa ang pandemya naaprubahan na ang programa aron magahinan og pundo.

Tumong niini ang paghatag og kahigayunan sa mga tinun-an nga kabus nga makakuha og kurso sa mga dagkung unibersidad sa Siyudad sa Sugbo.

Ang Talisay City College (TCC) nitanyag na sa libreng pagtungha apan kadtong mga tinun-an nga mopadulong sa kolehiyo nga adunay igong katakus sa usa ka kurso sama sa engineering ila kining suportahan.

“Take for example naay poor but deserving grade 12 student na bright kaayo og Math, someone na daku kaayo og potential ma engineer. Then he or she deserves to go to one of the best engineering schools and programs in Cebu,” matud ni Gullas.

Iyang gipasabot nga libre ang mga tinun-an sa tanang gastuhan ingon man hatagan sila og P20 mil nga allowance matag semester.

Asoy pa ni Gullas nga wala sa taga City Hall ang mopili sa ilang himuon nga scholar kay ila kining gitugyan sa Department of Education.

Iya sab giklaro nga dili sa ilang unibersidad paeskwelahon ang mga scholar.

Dugang niya nga nisuporta man o wala sa iyang administrasyon mahimo gyud nga makapahimulos niini basta lang Talisaynon nga angayan sa maong programa. /GMR (BANATNEWS)