Dul-an 4 mil naisyuhan og citation ticket sa CCTO

CEBU, Philippines — Mokabat ngadto sa 4 mil ka tawo ang naisyuhan og citation ticket sa Cebu City Transportation Office (CCTO) sa bulan sa Hulyo niining tuiga.

Kini ang gitug-an ni John Paul Amores, public information officer sa communications and electronics sa CCTO.

Matud ni Amores nga nagpasabot kini nga hugot ang ilang pagpatuman sa lagda sa balaod bisan og nasinati ang pandemiya karon diin nikabat ngadto sa 3,869 ka tawo nga adunay nahimong kalapasan ang naisyuhan nila og citation ticket.

Si Amores nagkanayon nga gamay lang ang gitugotan nga makabiyahe apan daghan gihapon ang mga nakalapas sa balaod diha sa kadalanan.

Ang CCTO naka-impound usab kini og 316 ka motorsiklo, 104 ka 4-wheels pataas, duha ka traysikad ug unom ka e-bike tungod kay expired na ang rehistro, lisensiya sukad pa niadtong nilabayng tuig, walay delivery permit, or/cr, depektibo ang suga, plate light ug expired ang TOP.

Giawhag sa CCTO ang mga biyahidor nga mosunod kanunay sa mga lagda. /BDB (BANATNEWS)

Show comments