CEBU, Philippines — Dakpon gihapon ang mga mag-angkasay sa motoriklo sa Dakbayan sa Talisay.
Kini maoy gipahibawo ni Jonathan Tumulak, ang traffic czar sa siyudad.
Si Tumulak nipasabot nga nakakita na sila sa kamanduan sa Department of Interior and Local Government nga mahimo na makapaangkas sa motorsiklo apan iseguro nga magtiayon ang sakay ingon man magbutang og barrier sa motorsiklo.
Matud ni Tumulak nga sa pagkakaron ilang gipaabot ang Implementing Rules and Regulation (IRR) nga gikan sa Land Transportation Office (LTO).
Niadtong Lunes, gitawagan ni Tumulak ang ulohang buhatan sa LTO apan wala pa gyud sila makahatag sa maong papeles.
Gawas pa ilang gipaabot ang “go signal” sa Department of Transportation (DOTr).
Nangayo lang una og pagsabot si Tumulak sa katawhan nga unta sila sabton ug respetuhon ang lagda aron dili madakpan.
Samtang sa Dakbayan sa Sugbo, mahimo na ang pag-angkasay sa motorsiklo.
Kini human ang Cebu City Transportation Office pinaagi sa ilang officer-in-charge nga si Alma Casimero nakadawat og suwat gikan sa DILG nga nagtugot sa pag-angkas basta motuman sa mga lagda.
Si Atty. Ian Kenneth Lucero, officer in-charge sa DILG-7, ang nipadala sa kopya sa suwat nga gipirmahan ni Secretary Eduardo Año may labot sa back-riding sa motorsiklo.
Gitugutan nga mag-angkas ang magtiayon ug managpuyo basta anaa nagpuyo sa samang balay.
Kinahanglan usab nga adunay accredited nga barrier o kadtong desinyo nga aprobado sa Inter-Agency Task Force. Ang mga magsakay og motorsiklo kinahanglang magsul-ob og facemask ug gwantis.
Sa gipagawas nga memorandum sa DILG, kinahanglan ang drayber magsul-ob usab og accredited nga crash helmet ingon man ang angkas. Rowena D. Capistrano/GMR (BANATNEWS)