CEBU, Philippines — Wala makaugpo ang negosyo sa ilegal nga drugas samtang anaa pa sa pandemiya.
Kini maoy gibutyag ni Police Major Gerard Ace Pelare, hepe sa Talisay City Police Station.
Matud pa niya nga daku og kausaban ang sitwasyon sa negosyo sa drugas karon kung itandi sa niaging mga buwan nga wala pa ang coronavirus.
Sila sa kapolisan naghimo og subsob nga pagpatuman sa mga safety protocols hinungdan nga mas daghan sila karon sa kadalanan nga makita.
Gani makasita sila dayun sa mga tawo nga manggawas nga walay face mask ug quarantine pass nga lakip sa guidelines samtang naa sa kwarantinas.
Nagkanayon si Pelare nga daghan sab sila og checkpoints nga gipatuman hinungdan nga ang mga dautang elemento wala gyud makaporma sa ilang ilegal nga binuhatan.
Sa pagkakaron ang mga player sa ilegal nga drugas nitago kay ang ilang mga panglihok-lihok dali nga mabantayan.
Dugang pa ni Pelare nga ang ilang grupo padayon nga nag-monitor niining mga ilegalista nga nagpaabot kung kanus-a kini molihok sa ilang modus. /GMR (BANATNEWS)