30 nakarekober gikan sa CCQC

CEBU, Philippines — Laing 30 ka pasyente ang na-discharge sa Cebu City Quarantine Center human nakarekober sa coronavirus disease niadtong Biyernes diin moabot na sa 129 ang kinatibuk-an nga nakarekober gikan sa maong isolation facility.

Ang CCQC, usa sa temporary treatment and monitoring facilities nga gi-establisar sa kagamhanan sa siyudad, kasamtangan nga nag-atiman sa 60 ka tawo, matud ni Cebu City Medical Center Administrator ug CCQC head Yvonne Cania.

Ang mga pasyente nga anaa sa quarantine center niagi og rigid treatment protocol nga naglangkub sa medical, pharmacological ug psychosocial interventions.

Ang CCQC naka-release na og upat ka batches sa recoveries sukad nga nanawat og moderate symptomatic patients sa COVID-19.

Ang mga COVID-19 patients nga cleared na nga mobiya sa quarantine center negatibo na sa virus sa ilang repeat tests.

Dugang nakarekober

Samtang nagpadayon sab ang pagsaka sa gidaghanon sa mga naulian sa COVID-19 sa Dakbayan sa Mandaue.

Hangtud Hulyo 11, 2020, niabot na og 434 ang kitabuk-ang gidaghanon human dugang 63 ang nakarekober gikan sa maong sakit.

Ang Dakbayan sa Talisay nakatala sab og 14 ka bag-ong kaso sa COVID-19 kinsa duha ang nakabsan sa kinabuhi.

Kasagaran sa mga nagpositibo mao kadtong mga trabahante sa tambalanan, adunay contact sa mga nagpositibo samtang ang uban nahibaw-an nga nagpositibo human sila ipaubos sa swab test sa dili pa sila mobalik sa ilang trabaho.

Ang mga asymptomatic ang gibutang na sa isolation facility samtang ang uban naa pa sa tambalanan.  Nakatala sab ang siyudad og unom ka tawo nga nakarekober sa maong virus.

Kaso sa rehion 7

Niabot na sa 11,574 ang kinatibuk-ang kompirmado nga kaso sa COVID-19 sa Central Visayas kutob niadtong Hulyo 10, 2020.

Kini human nga 181 ka bag-ong kaso ang natala sa maong adlaw gikan sa 1,271 ka laboratory result diin 15 ang repeat test.

Sa total confirmed cases, 6,210 ang active nga kaso sa COVID-19; 4,835 ang naayo na ug 529 ang namatay. Romeo T. Limpangog, Gabriel C. Bonjoc ug Le Phyllis F. Antojado/GMR (BANATNEWS)