Lungon panghadlok sa COVID sa Lapu Lapu

CEBU, Philippines — Hugot nga gipahimangnuan sa kagamhanan sa Dakbayan sa Lapu-Lapu ang mga molupyo sa kamahinungdanon sa face mask ug pagsunod sa social distancing pinaagi sa pagrekorikda sa kabarangayan dala ang lungon.

Si Mayor Junard “Ahong” Chan maoy nangulo sa rekorida nga gikuyogan sa pipila ka kawani nga maoy nag-apod-apod sa mga leaflets ngadto sa mga tawo ug panimalay.

Mabasa sa leaflets ang gidaghanon sa natala nga gitakbuyan sa coronavirus disease 2019 sa tibuok kalibutan.

Ang mga lungon gipahimutang sa checkpoints sa may tiilan sa Mandaue-Mactan Bridge ug ingon man sa merkado sa Poblacion ug Buaya.  Si Chan nipasabot nga ang rekorida nga nagdala og lungon mao lang ang pagpahimangno sa kamahinungdanon sa pagsunod sa mga health protocols sa paglikay sa COVID-19.

Pahimatngon

Samtang sa Dakbayan sa Talisay, gipangbutangan og pahinumdum labot sa COVID-19 ang mga traysikol.

Si mayor Gerald Anthony “Samsam” Gullas Jr. nagkanayon nga padayon ang pagsaka sa kaso sa COVID19 sa siyudad hinungdan nga mas maayo nga agresibo sila nga mopahibawo sa Talisaynon nga dili tiaw kining sakita.  Gawas sa pagpanghatag og pamphlets sa matag barangay, gihangyo ang mga drayber sa traysikol nga butangan sab og pahinumdum ang ilang unit aron mabasa sa mga sumasakay.

Nagtuo ang mayor nga ang sayo nga pagkahibawo sa mga sintomas mas maayo aron kahatagan dayun og aksyon.

“As cases continue to rise not only in Talisay, I ask all of you to not take this virus lightly. There is nothing light about this virus. This is a very dangerous virus,” tipik sa post ni Gullas sa iyang Facebook.

Iyang hangyo sa tanan nga kung adunay mamatikdan nga dili maayo sa panglawas mas maayo nga mosumbong dayun sa taga barangay aron matagad ug dili huwaton nga mograbe na nga lisud na matabang. Gabriel C. Bonjoc/GMR (BANATNEWS)