Kidnapper patay sa engkwentro

CEBU, Philippines — Patay ang usa ka kidnapper human nakigpinusilay sa mga sakop sa Anti-Kidnapping Group Visayas Field Units (AKG-7-VFU) sa Sitio Bantayan, Tungkop, Lungsod sa Minglanilla niadtong Domingo sa alas 11:15 sa gabii.

Ang suspek nailhan nga si Joavani Bogo alyas Vani nga nagpuyo sa maong lugar.

Matud ni Police Staff Sergeant Ernest Laspuña sa Minglanilla Police Station nga nagpahigayon og surveillance ang AKG-7-VFU pinangulohan ni Police Executive Master Sgt. Zosimo Ravanes ug Minglanilla Police.

Nahibaw-an nga nag-unang suspek si Bogo sa pag-kidnap kang Welkie Ibones parkingan sa pribadong tunghaan Siyudad sa Sugbo niadtong Hunyo 2.

Si Bogo nakamatikod sa presensya sa mga operatiba hinungdan nga nipabuto kini sa iyang armas.

Nibawos ang mga awtoridad hangtud napatay ang suspek nga armado og .38 revolver.

Gawas sa pagkalambigit ni Bogo sa kidnapping, usa sab siya ka high-value target (HVT) sa negosyo sa ilegal nga drugas ingon man pagkalambigit sab sa gun running.

Samtang nimando og lawom nga imbestigasyon ang Police Regional Office 7 human sa maong insidente.

Gikompirmar ni PRO-7 Director Albert Ferro nga nakig-alayon ang AKG-7-VFU labot sa impormasyon sa kaso ni Bogo.

Nakig-alayon na sab karon ang kapolisan sa pamilya sa biktima sa pagpang-kidnap kinsa padayon pa nga missing hangtud karon ug giingong dunay kalambigitan sa ilegal nga drugas. Sheriza Mae R. Uy/GMR