CEBU, Philippines — Nanawagan ang mga konsumedor sa Lungsod2 sa Tuburan nga ibalik ang pagdumala sa ilang patubig sa lokal nga kagamhanan.
Niadtong Biyernes nipahigayon og malinawong rally ang mga konsumedor atubangan sa buhatan sa SAVS Tuburan Water Corp.
Hinoon walay kadagkuan sa maong kompaniya nga niatubang sa mga raliyista sanglit natumong man nga holiday nga mao ang 122nd Philippine Independence Day. Usa ka Cesar Gomez nga nangulo sa grupo nagkanayon nga buot lang nila ipadayag ang ilang kadismaya sa pribadong nagdumala sa ilang patubig gumikan sa dili maayong serbisyo nga gihatag niini human sa tulo ka tuig na gikan sa pagtugyan sa lungsod sa patubig ngadto sa usa ka joint venture.
Gikwestiyon sa mga konsumedor kung nganong wala kapalambo ang kompaniya sa ilagn patubig nga unta sa ngalan pa lang sa ilang lungsod nga Tuburan, abunda kaayo sila og tubig.
Ang rally isip suporta sa gisang-at sa lokal nga kagamhanan nga kaso sa Regional Trial Court sa Toledo City aron bakwion ang kontrata tali sa SAVS Tuburan Water Corporation nga gipangulohan ni Arlene Villaroel.
“Tubig pribado, ibalik sa munisipyo,” maoy singgit sa mga konsumedor.
Dugang sa mga konsumedor nga samtang nagsuporta sila sa lokal nga kagamhanan nga magpabiling Covid-free, nag-antus sab sila sa walay tubig.
Si Mayor Danilo Diamante nihatag og pagtugot sa maong kalihukan basta sundon lang ang quarantine protocols ilabi na sa physical distancing maong dili daghan ang nagtapok.
Ang mga elemento sa kapolisan ug kabomberohan sa lungsod ang naniid lang sa maong kalihukan nga malinawon ug hapsay.
Matud ni Diamante nga duna nay kaso nga gisang-at sa korte niadtong Marso 3, 2020 apan wala pa kairog tungod kay naabtan sa community quarantine tungod sa coronavirus pandemic.
Ang Joint Venture Agreement gilagdaaan sa administrasyon ni kanhi mayor ug karon Bise Mayor Democrito Diamante tumong sa pagpalambo sa patubig sa lungsod.
Apan giingong pakyas ang kompanya sa pagtuman sa ilang kaakuhan sama sa pag-ilis sa mga linya sa tubig ug nasuta pa gyud nga nasudlan og kagaw ang tubig.
“Ilang pasalig sa public nga in two years potable and sufficient and supply sa water pero until now walay investment nga gihimo, ang collection lang ang ilahang gi-sustain,” matud ni Bise Mayor Diamante. (BANATNEWS)