CEBU, Philippines — Nakabiyahe na ang mga traysikol sa Dakbayan sa Talisay sugod kagahapon human sila mahatagi og special permit gikan sa City of Talisay-Traffic Operation Development Authority (CT-TODA).
Si Jonathan Tumulak pangulo sa CT-TODA nitataw nga dakong tabang kini sa mga traysikol drayber ang kalamboan nga dugay na nga wa makapamasahero.
Ang mga drayber mipresentar sa ilang mga OR ug CR, franchise ug photocopy sa lisensya sa drayber aron katagaan og special permit aron mahimo na dayon nga makabiyahe. Apan sa bag-ong ordinansa tag P15 na ang plitehan sa matag pasahero kay ibanan man ang gidaghanon sa pasahero.
Kinahanglan sab nga butangan og plastic barriers ang traysikol nga maoy magsilbing ali aron mapabilin ang proteksyon sa drayber ug mga pasahero aron dili dayon mataptan sa virus.
Nagkanayon si Tumulak nga miabot sa 1,700 ka traysikol ang ilang natagaan og franchise nga mao sab ang posibleng magdagan sa new normal. /IBM (BANATNEWS)