CEBU, Philippines — Nigahin og P8.5 milyones nga pundo gikan sa Kongreso si Kong. Janice Salimbangon alang sa mga residente sa ikaupat nga distrito nga wala nakadawat sa ayuda sa kagamhanan.
Gipasabot ni Salimbangon ang Social Amelioration Program (SAP) sa Department of Social Welfare and Development ug ang COVID-19 Adjustment Measures Program (CAMP) sa Department of Labor and Employment. Hinoon matud niya nga ang pundo dumalahon gihapon sa DSWD ug DOLE subay sa ilang lagda sa pagpangapod-apod niini ngadto sa mga kabus nga apektado sa kasamtangang krisis sa panglawas.
Sa P8.5 milyones, matud ni Salimbangon nga P5.5 milyones niini alang sa DSWD samtang P3 milyones sa DOLE. Ang maong mga ahensiya mao sab ang modeterminar sa kantidad nga ipanghatag.
Gipasalig ni Salimbangon ngadto sa mga tawo sa distrito nga naningkamot siya nga makahatag og ayuda gikan sa maongmga ahensiya. “Ako maningkamot sa pakig-koordinar sa mga ahenya sa gobyerno sama sa DOLE ug DSWD nga mahatagan ang atong mga kaigsuonan og ayuda ug uban pang klase nga suporta,” matud ni Salimbangon.
Si Salimbangon nakapangapod-apod na og 2,000 ka sakong bugas nga hinatag sa iyang mga higala.
Nanawagan sab siya sa katawhan nga mokooperar sa lokal nga kagamhanan ug motuman sa mga lagda sama sa pagpuyo sa balay ug pabiling kalmado.
“Ako mohangyo kaninyo nga unta motuman kamo sa mga pahimangno nga gilagda sa atong gobyerno sama sa social distancing ug proper hygiene aron malikayan nato ang pagkatap sa COVID-19 sa cuarto distrito,” matud ni Salimbangon.