CEBU, Philippines — Subay sa istrikto nga regulasyon sa border control sa probinsiya padulong sa Dakbayan sa Sugbo, ang Kapitolyo adunay giisyu nga Cebu Provincial Government Pass alang niadtong mga personnel sa exempted establishments.
Gawas sa company o office ID, ang maong pass maoy ipakita sa trabahante sa checkpoint sa border sa probinsiya.
Ang maong pass adunay picture sa trabahante uban sa ngalan niini ug control number. Anaa usab ang pirma ni Gobernador Gwendolyn Garcia.
Sa luyo nga bahin sa pass adunay pirma sa chief of staff sa gobernador ug provincial administrator. Nakalatid usab niini kun taga asa ang maong personnel aron maseguro nga dili kini magamit pag-adto sa laing lungsod ug dakbayan.
Ang mahatagan sa maong pass mao ra kadtong mga personnel nga apil sa skeletal workforce nga anaa sa listahan nga gisumiter sa mga buhatan o establisemento nga apil sa exempted sa border restriction sa probinsiya.
Matud ni Garcia nga dili mominus 2,165 na ang pangalan nga anaa sa mga listahan nga gisumiter. Apil sa mga nakasumiter na ang pipila ka buhatan sa gobiyerno.
Nakasumiter na usab ang pipila sa mga kompaniya sa banko, telecommunication, power ug uban pa.
Matud ni Garcia nga ang maong listahan i-assess pa kini sa Kapitolyo kun kinsa ra ang angay nga mahatagan sa pass. /GMR (BANATNEWS)