CEBU, Philippines — Higpit nga gisirado sa kapolisan ang bahin sa Sitio Manga sa Barangay Casuntingan, Dakbayan sa Mandaue sugod niadtong Huwebes sa hapon.
Kini human usa sa mga molupyo ang nasuta nga positibo sa coronavirus disease 2019 (COVID-19) sa testing nga gihimo.
Si Felix Suico Jr., pangulo sa Mandaue City Disaster Risk Reduction and Management Office, niingon nga ang maong tawo duol sa laing 30 ka panimalay nga dunay 150 ka tawo nga nagpuyo.
Matud ni Suico nga sa kinatibuk-an, ang Sitio Manga adunay 500 ka pamilya nga may 2,500 ka tawo.
Ang 30 ka panimalay nga silingan sa nagpositibo sa COVID-19 ang ilang ipaubos sa strict home quarantine ug usa lang sa mga nagpuyo ang ilang tugotan nga makagawas aron makapalit og pagkaon ug ubang importanteng kinahanglanon.
Ang mogawas kinahanglan nga magsul-ob og face mask, i-sanitize ug ipaubos sa body temperature check sa mga polis nga nag-checkpoint sa maong dapit.
Ang pasyente nga positibo sa COVID-19 nagpanuigon og 73-anyos nga lalaki nga kasamtangan karon nga anaa sa tambalanan sa Dakbayan sa Sugbo. /GMR (BANATNEWS)