CEBU, Philippines — Tulo ka mga sunog ang niulbo sa Dakbayan sa Sugbo ug Lungsod sa Argao kaghapon ug niadtong Miiyerkules.
Unang sunog nahitabo diha sa Barangay Suba, Dakbayan sa Sugbo mga ala 1:45 sa hapon niadtong Miyerkules ug hingpit na napawong ang kaso mga alas 2:15 sa hapon.
Si Fire Officer 2 Emerson Arceo, fire investigator sa Cebu City Fire Department nibutyag nga nikabat ngadto sa P90 mil ang danyos sa maong sunog.
Gisusi pa sa kabomberohan ang hinungdan sa maong sunog.
Ikaduhang sunog niulbo diha sa Block 5, Barangay Sawang Calero ug giingong nagsugod sa panimalay ni Julieta Reyes hinuon wala ra makadako ang kayo ug palong na kini pag-abot sa mgabombero.
Giingong P300 lang ang danyos sa maong sunog apan naangol si April Love Reyes, 31, kinsa nakaangkon og first degree burn. Ikatulong sunog nga giisa sa second alarm niulbo diha sa Barangay Poblacion, Lungsod sa Argao ug giingong nagsugod sa panimalay nila ni Fabiola Puerto ug Modesta Capolong. Nadawat sa kabomberohan ang alarma alas 5:56 sa hapon ug hingpit nga na-fire out alas 6:59.
Gibana-banang nikabat ngadto sa P167 mil ang danyos sa maong sunog ug gipaubos pa kini sa imbestigasyon. /BDB (BANATNEWS)